काठमाडाैँ । गत भदौ १० गते आएको अविरल वर्षा र भीषण बाढीले देशका प्रमुख जलविद्युत् आयोजनाहरूमा ठूलो भौतिक क्षति पुर्याउनुका साथै निर्माणधीन पूर्वाधारहरूमा जोखिम बढाएको छ।
सोही बाढी र पहिरोका कारण रसुवास्थित चिलिमे जलविद्युत् आयोजनाको सुरुङभित्र श्रमिकहरू फस्न पुगेका थिए। बाढीले सडक सञ्जाल पूर्ण रूपमा अवरुद्ध पारेपछि हालसम्म हेलिकप्टरमार्फत मात्रै आवतजावत तथा उद्धार कार्य सञ्चालन गरिँदै आएको थियो।
राष्ट्रिय स्वतन्त्र पार्टी (रास्वपा) का सांसद एवं सुरुङ विज्ञ इन्जिनियर श्रीराम न्यौपानेका अनुसार आजदेखि उद्धार स्थलसम्म अस्थायी सडक सञ्चालनमा आएको छ, जसले उद्धार प्रयासलाई थप प्रभावकारी बनाएको छ।
न्यौपाने स्वयम् उद्धारको प्रत्यक्ष नेतृत्व गर्न सुरुदेखि नै घटनास्थलमा खटिएका छन्। उनले सामाजिक सञ्जाल फेसबुकमार्फत जानकारी गराउँदै उद्धार कार्यलाई तीव्रता दिन आजैदेखि ‘नाइट सिफ्ट’ समेत सुरु गरी चौबीसै घण्टा निरन्तर काम गरिने बताएका छन्।
अस्थायी सडक जोडिएसँगै उपकरण र सामग्री ढुवानी सहज भएकाले सुरुङमा फसेका श्रमिकहरूको चाँडै सकुशल उद्धार हुने अपेक्षा गरिएको छ।
