काठमाडाैं । प्रधानमन्त्री वालेन्द्र शाहले देशका तीनवटै सुरक्षा निकायका प्रमुखहरूसँग उच्चस्तरीय छलफल सुरु गरेका छन् । गत भदौ १० गते रसुवाको भोटेकोशी नदीमा आएको बाढीपछि सिर्जित परिस्थिति, खोजी तथा उद्धार, राहत वितरण र घाइतेहरूको उपचार लगायतका समग्र विषयमा विस्तृत ब्रिफिङ लिन र आवश्यक निर्देशन दिन प्रधानमन्त्रीले यो बैठक बोलाएका हुन् ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा जारी छलफलका क्रममा प्रधानमन्त्री शाहले सर्वप्रथम नेपाली सेनाका प्रधानसेनापति अशोकराज सिग्देलसँग बाढी प्रभावित क्षेत्रमा भइरहेका कार्यहरूबारे जानकारी लिएकाे प्रधानमन्त्री कार्यालयले जनाएको छ।
प्रधानमन्त्री कार्यालयका अनुसार प्रधानसेनापति सिग्देलसँगको छलफललगत्तै प्रधानमन्त्री शाहले नेपाल प्रहरीका महानिरीक्षक दानबहादुर कार्की र सशस्त्र प्रहरी बल, नेपालका महानिरीक्षक नारायणदत्त पौडेलसँग पनि आजै छुट्टाछुट्टै छलफल गर्ने कार्यक्रम तय भएको छ।
बाढी प्रभावितहरूलाई चुस्त रूपमा राहत पुर्याउन र पुनर्स्थापनाको कामलाई तीव्रता दिन सुरक्षा निकायका प्रमुखहरूसँगको छलफललाई महत्त्वका साथ हेरिएको छ।
