काठमाडौं । गत भदौ १० गते रसुवाको भोटेकोशी नदीमा आएको भीषण बाढी र पहिरोपछि अवरुद्ध भएको चिलिमे जलविद्युत् आयोजनाको सुरुङभित्र जारी उद्धार कार्यमा महत्त्वपूर्ण सफलता हात परेको छ ।
आयोजना स्थलमा खटिएका नेपाली सेनाको उद्धार टोलीले सुरुङको करिब १०५ मिटर भित्र प्रवेश गरी खोजतलास गर्दा भित्रबाट चिसो हावाको दोहोरो बहाव भइरहेको र भित्र आवाज पठाउँदा प्रतिध्वनि आएको जानकारी दिएको छ ।
घटनास्थलमा प्रत्यक्ष रूपमा खटिएका राष्ट्रिय स्वतन्त्र पार्टीका सांसद तथा सुरुङ विज्ञ श्रीराम न्यौपानेका अनुसार नेपाली सेना, सशस्त्र प्रहरी र प्राविधिक टोलीले सुरुङभित्र जमेको लेदो पन्छाउने कामलाई निरन्तरता दिइरहेका छन् ।
सुरुङभित्र हावाको दोहोरो बहाव हुनु र भित्रबाट प्रतिध्वनि आउनुले भित्रको वातावरणमा अक्सिजनको पहुँच रहेको र मानिसहरू सुरक्षित स्थानमा आश्रय लिएर बसेको हुन सक्ने सकारात्मक संकेत मिलेको न्यौपानेको भनाई छ ।
गत भदौ १० गतेको अविरल वर्षासँगै आएको लेदोसहितको बाढीले चिलिमे जलविद्युत् आयोजनाको पहुँच मार्ग तहसनहस पार्नुका साथै सुरुङको प्रवेशद्वार पूर्ण रूपमा ढाकेको थियो । बाढीका कारण सुरुङभित्र श्रमिकहरू थुनिएपछि लगातार उद्धारको प्रयास भइरहे पनि भौगोलिक जटिलता र निरन्तरको लेदोका कारण उद्धार टोलीलाई भित्र प्रवेश गर्न कठिन भइरहेको थियो ।
हाल सुरक्षा निकायले साना एक्साभेटर तथा प्राविधिक उपकरणहरूको प्रयोग गरी सुरुङभित्रको ढल र लेदो हटाउने काम गरिरहेका छन् ।
सुरुङ विज्ञ समेत रहेका सांसद न्यौपानेले भित्रबाट प्राप्त यी नयाँ संकेतहरूले उद्धार टोलीमा उत्साह थपेको र थुनिएका श्रमिकहरूलाई चाँडै सकुशल बाहिर ल्याउने गरी काम भइरहेको जानकारी दिएका छन् ।
