रसुवा । भोटेकोशीमा आएको विनाशकारी बाढीपछि चिलिमे जलविद्युत् केन्द्रको सुरुङभित्र बेपत्ता भएकाहरूको खोजीमा आशा गरिए पनि पाँच जनाको जिवीत भने भेट्न सकिएन । सुरुङमा खोजी गर्ने क्रममा थप दुई जनाको शव भेटिएसँगै फेला परेका मृतकको संख्या पाँच पुगेको छ ।
नेपाली सेना, प्राविधिकलगायतको संयुक्त टोलीले बुधबार अपराह्न सुरुङभित्र खोजी गर्ने क्रममा थप दुई शव फेला पारेको चिलिमे जलविद्युत् कम्पनी लिमिटेडका प्रबन्ध निर्देशक बाबुराजा महर्जनले जानकारी दिए ।
यसअघि तीन जनाको शव फेला परिसकेको थियो । पछिल्लो पटक भेटिएका दुई शवसमेत गरी पाँचै शवलाई हेलिकोप्टरमार्फत नुवाकोटको त्रिशूली ल्याइएको छ । फेला परेका शवको पहिचान भने हुन बाँकी रहेको महर्जनले बताए ।
भदौ १० गते भोटेकोशी नदीमा आएको ठूलो बाढीपछि चिलिमे जलविद्युत् केन्द्रको विद्युत्गृहमा कार्यरत ६ जना कर्मचारी सम्पर्कविहीन भएका थिए । उनीहरूमध्ये प्रवद्र्धक कम्पनीका पाँच र नेपाल विद्युत् प्राधिकरणका एक कर्मचारी थिए ।
बाढीपछि सुरुङ तथा विद्युत्गृह क्षेत्रमा बेपत्ताको खोजी तीव्र पारिएको थियो। खोजीका क्रममा अहिलेसम्म पाँच जनाको शव फेला परेको छ भने अझै एक जना कर्मचारीको अवस्था अज्ञात छ । उनको खोजी कार्य जारी रहेको छ ।
