काठमाडौं । स्वतन्त्र ऊर्जा उत्पादकहरूको संस्था, नेपाल (इप्पान) का अध्यक्ष मोहन कुमार डाँगीले बाढी र पहिरोका कारण ५३० मेगावाट विद्युत् उत्पादन ठप्प भएको र यसको सही व्यवस्थापन नगरे देशमा पुन: लोडसेडिङ हुन सक्ने चेतावनी दिएका छन् । सगरमाथा टेलिभिजनको ’सगरमाथा विशेष’ नामक कार्यक्रमको अन्तर्वार्तामा बोल्दै अध्यक्ष डाँगीले उक्त कुरा बताएका हुन् ।
डाँगीका अनुसार भाद्र महिनामा आएको विनाशकारी बाढी–पहिरोले त्रिशूली करिडोर लगायत देशका विभिन्न जलविद्युत् आयोजना र प्रसारण लाइनमा गम्भीर क्षति पुर्याएको छ । जसका कारण ४३१ मेगावाटका आयोजना पूर्ण रूपमा बन्द हुनुका साथै प्रसारण लाइन ध्वस्त हुँदा थप आयोजनाहरू समेत प्रभावित भएका छन् ।
अहिले सुक्खायाम (हिउँद) सुरु भइसकेको र नदीहरूमा पानीको बहाव घट्दै जाँदा नदी प्रवाहमा आधारित (रन अफ रिभर) आयोजनाहरूको उत्पादन घटेर करिब २५ प्रतिशतमा झर्ने अवस्था छ । “साँझको पीक लोडको समयमा विद्युत्को माग उच्च हुन्छ, यस्तो बेला ५३० मेगावाट विद्युत् प्रणाली बाहिर हुनु ठूलो चुनौती हो,“ अध्यक्ष डाँगीले भने, “यदि नेपाल विद्युत् प्राधिकरण र सरकारले पीक समयको सही व्यवस्थापन (म्यानेजमेन्ट) गर्न सकेनन् भने लोडसेडिङको अवस्था आउन सक्छ ।“
उनले सरकार तथा विद्युत् प्राधिकरणलाई ध्वस्त भएका प्रसारण लाइन युद्धस्तरमा पुनर्निर्माण गर्न, निजी क्षेत्रसँग सहकार्य गर्न र नीतिगत अड्चनहरू तत्काल फुकाउन आग्रह गरे । निजी क्षेत्रले छोटो समयमै १५५ मेगावाट विद्युत् प्रणालीमा फर्काउन सक्ने भए पनि प्रसारण लाइनको अभाव र सरकारी ढिलासुस्तीले समस्या जटिल बनेको उनको भनाइ छ ।
सरकार र विद्युत् प्राधिकरणले गम्भीरतापूर्वक म्यानेजमेन्ट सुधार गरेर सर्वसाधारणलाई अँध्यारोबाट जोगाउनुपर्नेमा अध्यक्ष डाँगीले जोड दिएका छन् ।
