काठमाडौं । बुढीगण्डकी र स्यार खोलामा आएको बाढीले अवरुद्ध विद्युत् सेवा पुन: सञ्चालन गर्न गोरखामा मर्मत तथा पुन:स्थापनाको काम तीव्र पारिएको छ । आरूघाट गाउँपालिकाका बाँकी क्षेत्रमा आज रातिसम्म विद्युत् सेवा सञ्चालन गर्ने प्रयास भइरहेको छ ।
ऊर्जा, जलस्रोत तथा सिँचाइ मन्त्रालयका अनुसार आरूघाट गाउँपालिका–३ स्थित केउरपानी र ढुंगेमा थप दुई वटा ट्रान्सफर्मर चार्ज गर्ने तयारी भइरहेको छ ।
नेपाल विद्युत् प्राधिकरणको आरूघाट वितरण केन्द्रका अनुसार आरूघाट गाउँपालिका–३ का सोती, लिदिङ र स्यामराङका तीन वटा ट्रान्सफर्मर तथा धार्चे गाउँपालिकाका विभिन्न क्षेत्रमा विद्युत् सेवा अवरुद्ध छ । अन्य क्षेत्रमा भने विद्युत् सेवा सञ्चालनमा आइसकेको छ ।
सडक अवरुद्ध हुँदा मर्मत कार्य प्रभावित भएको वितरण केन्द्रले जनाएको छ । सडक खुल्दै गएसँगै विद्युत् लाइन मर्मत गरी सेवा सञ्चालन गरिने केन्द्रको भनाइ छ ।
बाढीले गोरखाको धार्चे गाउँपालिकामा ७० भन्दा बढी उच्च भोल्टेजका पोलमा क्षति पुर्याएको छ । त्यस्तै, सोती, आर्खेत र आरूघाट बजार क्षेत्रमा वितरण लाइनका पोलमा क्षति पुगेको छ। धादिङको त्रिपुरासुन्दरी गाउँपालिका–२ स्थित स्याउली बजारमा पनि ६ वटा पोलमा क्षति पुगेको मन्त्रालयले जनाएको छ ।
बाढीका कारण गोरखा र धादिङका विभिन्न जलविद्युत् आयोजनाका संरचना, पहुँच सडक, पुल तथा निर्माण सामग्रीमा समेत क्षति पुगेको छ ।
मन्त्रालयका अनुसार बाढीपछि अवरुद्ध विद्युत् सेवा पुन: सञ्चालन गर्ने क्रममा भीमसेन थापा गाउँपालिकाका वडा नं. २, ३ र ४ तथा आरूघाट बजारसहित डाँडागाउँ र आरूपोखरी क्षेत्रमा विद्युत् सेवा सञ्चालनमा आइसकेको छ । मन्त्रालयले यसै हप्ताभित्र सबै प्रभावित क्षेत्रमा विद्युत् सेवा पुन: सञ्चालन गर्ने लक्ष्य राखेको छ ।
