काठमाडौं । मोरङको कानेपोखरी गाउँपालिका–२ स्थित केरौनमा निर्माण गरिएको १३२/३३ केभी सबस्टेसन सञ्चालनको अन्तिम चरणमा पुगेको छ । निर्धारित समयभन्दा झण्डै दुई वर्ष पछाडि धकेलिएको आयोजना निर्माण सम्पन्न भएसँगै अहिले चार्जिङ प्रक्रियामा प्रवेश गरेको हो ।
सबस्टेसनसँगै त्यसलाई जोड्ने ३३ केभी सब–ट्रान्समिसन लाइनको कामसमेत पूरा भएको छ। यस आयोजनाले मोरङको केरौन, रङ्गेली र विराटचोक आसपासको विद्युत् आपूर्ति प्रणालीलाई थप व्यवस्थित बनाउन सहयोग पुग्ने अपेक्षा गरिएको छ ।
आयोजना निर्माणका लागि १० नोभेम्बर २०२१ मा ठेक्का सम्झौता गरिएको थियो । सम्झौताअनुसार १० नोभेम्बर २०२३ सम्म निर्माण सक्नुपर्ने भए पनि तोकिएको अवधिमा काम पूरा हुन सकेन । निर्माणमा निरन्तर ढिलाइ भएपछि आयोजनाको ठेक्का अवधि आठ पटकसम्म थप्नुपरेको थियो ।
ऊर्जा, जलस्रोत तथा सिँचाइमन्त्री बिराज भक्त श्रेष्ठले कोशी प्रदेशको निरीक्षणका क्रममा करिब दुई महिनाअघि आयोजनाको प्रगतिबारे चासो राख्दै निर्माणलाई गति दिन निर्देशन दिएका थिए । आवश्यक सहजीकरण र निर्देशनपछि निर्माणले तीव्रता पाएको र अहिले सञ्चालनको तयारीसम्म आइपुगेको मन्त्री श्रेष्ठले बताएका छन् ।
प्राविधिक हिसाबले पनि यो सबस्टेसन क्षेत्रीय विद्युत् वितरण प्रणालीका लागि महत्त्वपूर्ण पूर्वाधार हो । कुल १४८.५ एमभिए क्षमता रहेको सबस्टेसनमा ६३ एमभिएका दुईवटा १३२/३३ केभी ट्रान्सफर्मर जडान गरिएका छन् । त्यस्तै, स्थानीय वितरण प्रणालीमा विद्युत् आपूर्ति गर्न २२.५ एमभिएको एउटा ३३/११ केभी ट्रान्सफर्मर पनि राखिएको छ ।
सबस्टेसनलाई दुहवी–दमक १३२ केभी प्रसारण लाइनसँग जोडिएको छ । यहाँबाट विद्युत् वितरणका लागि पाँचवटा ११ केभी फिडरको व्यवस्था गरिएको छ । यसबाहेक केरौन–रङ्गेली र केरौन–विराटचोक जोड्ने ३३ केभी डबल सर्किट प्रसारण लाइनसमेत निर्माण गरिएको छ ।
सबस्टेसन पूर्ण रूपमा सञ्चालनमा आएपछि सम्बन्धित क्षेत्रमा विद्युत् आपूर्ति विस्तार तथा वितरण प्रणालीलाई थप भरपर्दो बनाउन पूर्वाधार तयार हुनेछ । लामो समयदेखि निर्माणाधीन रहेको आयोजना सम्पन्न हुनु यस क्षेत्रको विद्युत् पूर्वाधार विकासका दृष्टिले महत्त्वपूर्ण उपलब्धि हो ।
