काठमाडौं । रसुवामा अवस्थित माथिल्लो त्रिशूली–३ ‘ए’ जलविद्युत् आयोजना क्षेत्रमा बेपत्ता भएका कर्मचारी तथा श्रमिकहरूको तीव्र खोजी एवम् उद्धारका लागि नेपाल विद्युत् प्राधिकरणले विशेष टोलीहरू परिचालन गरेको छ ।
कठिन भौगोलिक बनावट, खराब मौसम र हवाइमार्गबाट उद्धार सामग्री पुर्याउनुपर्ने जटिलताका बाबजुद उद्धार कार्यलाई निरन्तरता दिइएको छ। खोज प्रक्रियालाई व्यवस्थित र प्रभावकारी बनाउन प्राधिकरणले काठमाडौँस्थित प्रधान कार्यालय, बट्टार–त्रिशूली र पावरहाउस नजिकैको शान्तिबजारमा तीनवटा अलग–अलग टोली गठन गरी नेपाली सेना तथा अन्य प्राविधिक विज्ञहरूसँग निरन्तर समन्वय गरिरहेको छ ।
सामग्री व्यवस्थापन र तत्काल सूचना आदानप्रदानका लागि प्राधिकरणले ‘एनईए (त्रिशुली डिजास्टर रेस्क्यु)’ नामक ह्वाट्सएप समूह प्रयोगमा ल्याएको छ । जसका माध्यमबाट बट्टारमा रहेको मौज्दात सामग्री घटनास्थलतर्फ पठाइनेछ । बट्टारमा सामग्री अभाव भएमा काठमाडौँ टोलीले ह्वाट्सएपमार्फत जानकारी प्राप्त गरी तत्काल आवश्यक उपकरण उपलब्ध गराउने व्यवस्था मिलाइएको छ ।
तर अनौपचारिक स्रोतबाट माग भएका सामग्री आपूर्ति गर्न भने प्राधिकरण बाध्य हुने प्राधिकरणले बताएको छ । उद्धार कार्यका लागि माथिल्लो त्रिशूली–३ ‘ए’ बाट प्रबन्धक आभाष ओझा, बट्टार–त्रिशूलीबाट निर्देशक धीरेन्द्र चौधरी र काठमाडौँ प्रधान कार्यालयबाट पशुपति गौतमको संयोजकत्वमा टोलीहरू खटाइएको छ ।
विपद्मा परेका आफ्ना जनशक्तिको खोजीलाई उच्च प्राथमिकतामा राख्दै प्राधिकरणले उपलब्ध सम्पूर्ण स्रोत र साधनको अधिकतम प्रयोग गरिरहेको बताएको छ ।
