काठमाडौं । रसुवा स्थित चिलिमे जलविद्युत केन्द्रको भूमिगत विद्युतगृहमा फसेका कर्मचारीहरूको उद्धार कार्य तीव्र रूपमा भइरहेको छ । पूर्व ऊर्जा मन्त्री तथा विद्युत प्राधिकरणका पूर्व कार्यकारी निर्देशक कुलमान घिसिङ नेपाली सेनाको बुलावामा प्राविधिक सुझाव, समन्वय र सहजीकरणका लागि आफैँ घटनास्थल पुगेका छन् ।
सुरुङभित्र करिब १२० मिटर भित्रबाट आवाजको प्रतिध्वनि (इको) सुनिएको र चिसो हावा समेत आइरहेकाले फसेका व्यक्तिहरू सकुशल रहेको आशा र अनुमान बलियो बनेको छ ।
मुख्य पहुँच सुरुङमा जम्मा भएको ठूलो मात्राको लेदो, बालुवा र ढुंगा हटाउँदै उद्धार टोली निरन्तर अगाडि बढिरहेको छ । अब विद्युतगृह पुग्न करिब १०० मिटर मात्र बाँकी रहेको र स्याफ्रुवेसीतर्फबाट सुरुङसम्म बाटो बनाउन एक्स्क्याभेटर प्रयोग गरी काम भइरहेको छ । आजसम्ममा सुरुङस्थलमा एक्स्क्याभेटर र लोडर पुग्ने सम्भावना रहेको छ । जसले पुगेपछि उद्धार कार्यमा अझ तीव्र गति आउने विश्वास लिइएको छ ।
उद्धार कार्यमा नेपाली सेना, नेपाल प्रहरी, सशस्त्र प्रहरी बल, भारतीय सेनाका विज्ञ उद्धार टोली, स्थानीय प्रशासन र चिलिमे जलविद्युत कम्पनीका कर्मचारीहरू अहोरात्र खटिएका छन् ।
चिलिमे जलविद्युत कम्पनीका पूर्व प्रबन्ध–निर्देशकका रूपमा विद्युतगृह सञ्चालनको पुरानो अनुभव प्रयोग गर्दै उद्धार टोलीको मनोबल उच्च राखिएको र कठिन परिस्थितिमा पनि सबै पक्षको एकीकृत प्रयासबाट उद्धार सफल हुने विश्वास व्यक्त गरिएको छ ।
