काठमाडौं । भोटेकोशी तथा त्रिशूली करिडोरमा हालै आएको बाढीका कारण क्षतिग्रस्त जलविद्युत आयोजनाहरूलाई पुनर्निर्माण गरी राष्ट्रिय प्रसारण प्रणालीमा पुन: जोड्न कम्तीमा दुई वर्ष लाग्ने स्वतन्त्र ऊर्जा उत्पादकहरूको संस्था नेपाल (इपान) का निर्वर्तमान अध्यक्ष तथा ऊर्जा मन्त्रीका सल्लाहकार गणेश कार्कीले बताएका छन् । कार्कीले रेडियो कान्तिपुरसँग कुराकानी गर्दै अकल्पनीय र बाढीको ठूलो स्वरूपका कारण जलविद्युत क्षेत्रमा भौतिक तथा मानवीय क्षति उच्च भएको बताए ।
कार्कीका अनुसार बाढीले सडक, पुल तथा सुरुङका प्रवेशद्वारहरू पुरेकाले उद्धार तथा भारी उपकरण पुर्याउन सुरुका दिनमा निकै चुनौती भएको बताए । भौगोलिक जटिलता र पूर्वाधार ध्वस्त भएकाले चाहेर पनि तत्काल उद्धार कार्य तीव्र पार्न नसकिएको उनले स्पष्ट पारे । भविष्यमा आउने यस्ता विपद्बाट जोगिन अब बन्ने नयाँ आयोजनाहरूमा संरचनात्मक परिवर्तन र उच्च सुरक्षा मापदण्ड अपनाउनुपर्नेमा उनले जोड दिए ।
क्षतिग्रस्त आयोजनाहरूलाई पुन: सञ्चालनमा ल्याउन बिमा कम्पनीहरूले द्रुत गतिमा भुक्तानी दिनुपर्ने र सरकारले लाइसेन्सको अवधि थप्ने जस्ता नीतिगत सहजीकरण गरिदिनुपर्ने कार्कीको भनाइ छ । यस्तै, बाढीका कारण उर्जा क्षेत्रले ठूलो संख्यामा उच्च दक्ष जनशक्ति गुमाउनु परेको र यसको अभाव पूर्ति गर्न लामो समय लाग्नेसमेत उनले बताए ।
