काठमाडौं । म्याग्दीमा निर्माण सम्पन्न भएको ४० मेगावाट क्षमताको राहुघाट जलविद्युत् आयोजनासँग आफ्नो विगतको भूमिकालाई स्मरण गर्दै पूर्वऊर्जामन्त्री तथा उज्यालो नेपाल पार्टीका सभापति कुलमान घिसिङले खुसी व्यक्त गरेका छन् ।
रघुगंगा हाइड्रोपावर लिमिटेडले प्रवद्र्धन गरेको राहुघाट जलविद्युत् आयोजना निर्माण सम्पन्न भएको खबरले आफूलाई खुसी र गौरवको अनुभूति भएको घिसिङले सामाजिक सञ्जालमार्फत बताएका छन् ।
घिसिङका अनुसार नेपाल विद्युत् प्राधिकरणको ११औँ तहमा कार्यरत रहँदा उनले राहुघाट आयोजनाको निर्देशकको जिम्मेवारी सम्हालेका थिए । त्यतिबेला विभिन्न कारणले ठेक्का व्यवस्थापनमा समस्या आएर आयोजना रुग्ण अवस्थामा पुगेको उनले स्मरण गरेका छन् ।
उनका अनुसार पुरानो ठेक्का अन्त्य गरेर आयोजनाको क्षमता ३२ मेगावाटबाट बढाई ४० मेगावाट पुर्याउने निर्णय गरिएको थियो । पछि नेपाल विद्युत् प्राधिकरणको कार्यकारी निर्देशकको जिम्मेवारीमा रहँदा स्थानीय बासिन्दालाई समेत आयोजनाको सेयर स्वामित्व सुनिश्चित गर्ने उद्देश्यले कम्पनी मोडलमा आयोजना निर्माण अघि बढाइएको उनले बताएका छन् ।
भारतीय सरकारको निर्यात–आयात बैंक (एक्जिम बैंक)बाट प्राप्त सहुलियतपूर्ण ऋण अर्थात् ‘लाइन अफ क्रेडिट’ मार्फत आयोजना निर्माण गरिएको घिसिङले उल्लेख गरेका छन् । विभिन्न चुनौती, उतारचढाव र कठिनाइ पार गर्दै आयोजना सम्पन्न भएको भन्दै उनले यसलाई दृढ संकल्प, संस्थागत प्रतिबद्धता र सामूहिक प्रयासको सफल उदाहरणका रूपमा व्याख्या गरेका छन् ।
आयोजना निर्माण सम्पन्न गर्न प्रत्यक्ष तथा अप्रत्यक्ष रूपमा योगदान पुर्याउने कर्मचारी, प्राविधिक, निर्माण व्यवसायी, स्थानीय समुदाय, लगानीकर्ता, भारतीय सरकार तथा अन्य सरोकारवालालाई घिसिङले धन्यवाद तथा बधाई दिएका छन् ।
राहुघाट जलविद्युत् आयोजना नेपाल विद्युत् प्राधिकरणको सहायक कम्पनी रघुगंगा हाइड्रोपावर लिमिटेडमार्फत प्रवद्र्धित आयोजना हो ।
