काठमाडौं । बागलुङको ताराखोला गाउँपालिकामा सञ्चालित २.५ मेगावाट क्षमताको दरमखोला ‘ए’ जलविद्युत आयोजनाको विद्युत उत्पादन तथा प्रसारण सेवा अवरुद्ध भएको छ ।
सयपत्री हाइड्रोपावर लिमिटेडका अनुसार असोज ९ गते आएको बाढीले आयोजनाका विभिन्न संरचनासँगै विद्युत प्रसारण लाइनमा क्षति पुर्याएपछि विद्युत उत्पादन बन्द भएको हो ।
कम्पनीले नेपाल स्टक एक्सचेन्ज (नेप्से)लाई दिएको जानकारीअनुसार आयोजनाको स्विचयार्डदेखि नेपाल विद्युत प्राधिकरणको हरिचौर सबस्टेसनसम्म जोडिएको ३३ केभी प्रसारण लाइनका पोल र तारमा बाढीले क्षति पुर्याएको छ । यही क्षतिका कारण असोज ९ गते राति ११ बजेदेखि आयोजनाबाट विद्युत उत्पादन र प्रसारण हुन सकेको छैन ।
यसैबीच, असोज १० गते राति ११ बजेपछि ताराखोला गाउँपालिकामा रहेका सञ्चार टावरमा समेत विद्युत आपूर्ति बन्द भएको कम्पनीले जनाएको छ । विद्युत आपूर्ति अवरुद्ध भएपछि सञ्चार सेवा प्रभावित भएको र आयोजनास्थलमा रहेका कर्मचारीसँग सम्पर्क स्थापित गर्न नसकिएको कम्पनीको भनाइ छ ।
कर्मचारीसँग सम्पर्क हुन नसकेका कारण बाढीबाट आयोजनाका संरचनामा भएको थप क्षतिको विवरणसमेत तत्काल प्राप्त गर्न नसकिएको कम्पनीले जनाएको छ । आयोजनाको विद्युत उत्पादन कहिलेदेखि पुन: सञ्चालनमा आउने भन्ने विषयमा भने कम्पनीले तत्काल कुनै समयसीमा सार्वजनिक गरेको छैन ।
