काठमाडौं । ललितपुर महानगरपालिकाका प्रमुख चिरीबाबु महर्जन र नेपाल विद्युत प्राधिकरणका कार्यकारी निर्देशक दीर्घायु कुमार श्रेष्ठबीच भनेट भएको छ । उनीहरुबीच अव्यवस्थित तारको व्यवस्थापनसहित विभिन्न विषयमा छलफल भएको छ ।
नेपाल विद्युत प्राधिकरणले दिएको जानकारीअनुसार ललितपुर महानगरपालिकाको प्रमुखको कार्यकक्षमा भएको भेटमा स्मार्ट सडक बत्ती, विद्युतीय सवारी चार्जिङ स्टेसन, अव्यवस्थित तारको व्यवस्थापन तथा भूमिगत विद्युत वितरण प्रणालीलगायतका विषयमा छलफल भएको हो ।
भेटमा प्राधिकरणका निर्देशक श्रीराम पोखरेललगायतका अधिकारीहरूको समेत सहभागिता रहेको प्राधिकरणले जनाएको छ । छलफलका क्रममा यी क्षेत्रमा आपसी समन्वय र सहकार्यलाई थप प्रभावकारी बनाउने विषयमा कुराकानी भएको थियो ।
प्राधिकरणका कार्यकारी निर्देशक श्रेष्ठले प्राधिकरणबाट सञ्चालन भइरहेका भूमिगत विद्युत प्रणालीसम्बन्धी आयोजनाको प्रभावकारी कार्यान्वयनका लागि आवश्यक सहजीकरण तथा समन्वय गरिदिन महानगरपालिकासँग आग्रह गरेको प्राधिकरणले जानकारी दिएको छ ।
त्यस्तै, सडक बत्तीबापत महानगरपालिकाबाट प्राधिकरणलाई तिर्न बाँकी रहेको बक्यौता असुलीका लागि समेत आवश्यक सहयोग गर्न श्रेष्ठले आग्रह गरेका थिए ।
महानगर प्रमुख महर्जनले छलफलमा उठाइएका विषयमा महानगरपालिकाका तर्फबाट आवश्यक सहयोग, समन्वय तथा सहकार्य गर्ने प्रतिबद्धता व्यक्त गरेको प्राधिकरणले जनाएको छ ।
