काठमाडौं । नेपाली सेनाले रुपन्देहीको सैनामैनामा १० मेगावाटको सौर्य ऊर्जा परियोजना सञ्चालनको तयारी गरेको छ ।
लाभग्राहीको सङ्ख्या १० लाख नाघेको र आयस्रोतमा सङ्कुचन देखिन थालेपछि सैनिक कल्याणकारी कोषको दीर्घकालीन आर्थिक दिगोपन चुनौतीपूर्ण बन्दै गएकाले सौर्य ऊर्जामा पनि लगानी गर्न लागेको कोषको भनाई छ ।
बैंकबाट प्राप्त हुने ब्याज आम्दानीमा गिरावट तथा संयुक्त राष्ट्रसङ्घबाट शान्ति सैनिकको सङ्ख्या र बजेटमा गरिएको कटौतीले कोषको आयमा प्रभाव पारेको छ ।
यस अवस्थालाई ध्यानमा राख्दै कोषले आयस्रोत विविधीकरण र दीर्घकालीन प्रतिफल दिने परियोजनामा लगानी गर्ने योजना अघि बढाएको छ । यसैक्रममा रुपन्देहीको सैनामैनामा करिब १० मेगावाट क्षमताको सौर्य ऊर्जा परियोजना सञ्चालनमा ल्याउने तयारी भइरहेको छ ।
परियोजनाले कोषको दीर्घकालीन आयस्रोत बढाउनुका साथै नेपाल सरकारको वैकल्पिक ऊर्जा नीतिलाई सहयोग पुग्ने अपेक्षा गरिएको छ ।
कोषले नेपाल सरकारलाई वार्षिक रूपमा करिब ७० करोड रुपैयाँसम्म कर बुझाउँदै आएको छ । यसबाट सैनिक परिवारको कल्याणसँगै राज्यको राजस्व र राष्ट्रिय अर्थतन्त्रमा पनि योगदान पुगेको छ ।
समग्रमा सैनिक कल्याणकारी कोषले सैनिक परिवारको शिक्षा, स्वास्थ्य, रोजगारी र आर्थिक सुरक्षामा योगदान पुर्याउनुका साथै दक्ष जनशक्ति उत्पादन तथा उद्यमशीलता प्रवर्द्धनमा समेत भूमिका निर्वाह गर्दै आएको छ । बढ्दो दायित्वअनुसार कोषलाई आर्थिक रूपमा दिगो, सेवामुखी र समयसापेक्ष बनाउँदै लैजानुपर्ने आवश्यकता रहेको सेनाले जनाएको छ ।
