काठमाडौं । यस वर्षको लक्ष्मीपूजाको दिन आइतबार विद्युत् प्रणालीमा १८१३ मेगावाट मात्र विद्युत् माग पुगेको छ । यो गत वर्षको लक्ष्मी पूजा भन्दा ३.९० प्रतिशत मात्र बढी हो ।
नेपाल विद्युत् प्राधिकरणका अनुसार लक्ष्मीपूजाको साँझ ६ बजेर १५ मिनेटमा प्रणालीको उच्चतम माग (पिक लोड) १८१३ मेगावाट पुगेको हो । गत वर्ष लक्ष्मी पूजाको साँझ उच्चतम विद्युत माग १७४५ मेगावाट पुगेको थियो ।
आन्तरिक उत्पादन र निर्यात पनि घट्यो
यो वर्ष लक्ष्मी पूजाको दिन देशभित्रको कुल विद्युत् उत्पादन २ हजार ४००.३० मेगावाट रहेको थियो । गत वर्षको लक्ष्मीपूजाको विद्युत उत्पादन भने २७६० मेगावाट रहेको थियो । यो वर्षको कुल उत्पादन ३६० मेगावाटले कम हो ।
त्यस्तै यो वर्ष लक्ष्मीपूजाको दिन आन्तरिक माग पूरा गरेपछि बाँकी ५८७.३० मेगावाट विद्युत् भारत र बंगलादेशमा निर्यात गरिएको प्राधिकरणले जनाएको छ ।
गत वर्ष लक्ष्मीपूजाको दिन भने १०१५ मेगावाट विद्युत निर्यात भएको थियो । यो वर्ष निर्यात भएको परिमाण गत वर्षको भन्दा ४२८ मेगावाट कम हो ।
प्राधिकरणका अनुसार पिक लोडको समयमा निजी क्षेत्रका जलविद्युत् आयोजनाबाट १५३६.५० मेगावाट विद्युत् उत्पादन भएको थियो ।
त्यस्तै, प्राधिकरणका सहायक कम्पनीबाट ४९९.२० मेगावाट, प्राधिकरणका जलाशय तथा नदी प्रवाही (आरओआर र पीआरओआर) आयोजनाबाट ३४२.३० मेगावाट र स्टोरेज आयोजनाबाट २२.३० मेगावाट विद्युत् उत्पादन गरिएको थियो ।
लक्ष्मीपूजाको दिन विद्युत् प्रणालीमा कुनै अवरोध (पावर इन्टरप्सन) नभएको पनि प्राधिकरणले जनाएको छ ।
उपत्यकाको माग बढ्यो, उपत्यका बाहिर घट्यो
लक्ष्मीपूजाको साँझ काठमाडौं उपत्यकाको अधिकतम विद्युत् माग ४८९.५० मेगावाट पुगेको प्राधिकरणको तथ्यांकमा उल्लेख छ । यो गत वर्षको तुलनामा ८७ मेगावाट बढी हो । गत वर्ष उपत्यकामा ४०२ मेगावाट मात्र माग पुगेको थियो ।
तर, उपत्यकाबाहेक देशका अरु स्थानको विद्युत माग भने १९ मेगावाटले घटेको छ । गत वर्ष उपत्यका बाहेक देशका अरु ठाउँको विद्युत माग १३४३ मेगावाट रहेकोमा यो वर्ष १३२४ मेगावाटमा सिमित भएको छ ।
नेपालमा भोटेकोशी बाढीले विद्युत प्राधिकरणका आयोजनामा क्षति भएपछि भारत र बंगलादेश तर्फको निर्यात भने ४२८ मेगावाट भन्दा बढीले घट्नुका साथै कुल उत्पादन पनि ३६० मेगावाटले घटेको हो ।
